Dishop Nicholas "Mang Thang"

 Dishop Nicholas Mang Thang cu:  Chin mi lakah Roman Catholic Bu in Bishop a hmu hmasa bik a si.

Father Nicholas Mang Thang cu 1943 kum August 18 ni ah Mindat Peng Thing Lawng khua ah a chuak. A pa cu U Khui Siang Ma a si i a nu cu Daw Om Pai a si. Amah cu upa bik fapa a si i a chuakṭi ah naupa pakhat le far panga a ngei.

Nicholas Mang Thang cu 1950 kum in 1951 kum tiang Mucu ah a kai. Cun 1951 kum in 1952 kum tiang ca cawn loin a naunu inn ah a umpi.

Cu hnuah 1952 kum in 1954 kum tiang Mindat St. Theresa Middle School ah ca a cawng ṭhan. Mah hnu cun 1954 kum in 1958 kum tiang Mandalay St. Peter High School ah ca a cawng.

Cun 1958 kum in 1964 kum tiang De La Salle Brothers nih an tuahmi Maymyo St. Albert High School ah ca a cawng ṭhan i mah Maymyo Sianginn cun Tang hra (Matriculation) a awng.

Mah tang hra camipuai a awn hnu 1964 kum in 1966 kum tiang, kum hnih chung Maymyo Minor Seminary ah English le Latin a cawng ṭhan.

Cun 1966 kum in 1973 kum tiang Yangon St. Joseph Major Seminary ah Philosophy le Theology hna cu kum sarih chung a cawng.

Nicholas Mang Thang cu 1973 kum April 28 ni ah Mindat khua ah Archbishop Moze U Ba Khin nih Father Paulinus Mang Ha Gei he hmunkhat ah Pathian rianṭuan khawhnak Reverened min a pek hna.

Reverend min a hmuh hnu 1973 kum in 1978 kum tiang Chin Ramkulh Thlanglei Matupi  khua ah Roman Catholic Mission rianṭuan ah an kuat i Mission rianṭuan ah Matupi khua ah cun a kal.

Rev. Nicholas Mang Thang cu Matupi khua ah cun a va phan i Biakinn hmete pakhat le a cih le a vampang a rawk cangmi deu hmete pakhat a va hmuh.

Umnak inn a um lo caah mah deu hmete cu aa remh i a um. Ruah a sur tikah an zut dih i, zan a ih tikah a zuhlonak hmun ah aa ṭhial lengmang.

Matupi khua Khrihfa hna cu bu tampi ah an i ṭhen dih caah Catholic Biaknak le an phungki hna cu an duh hna lo. Bu dangdang hna nih cun a umnak inn hmun zong cu hrawh duh ah ajrpm&if; zung pawl he tiah chuh awkin tu le tu an i zuam.

Asinain Father Nicholas Mang Thang cu Matupi pengchung i khuate kipah a kal i Roman Catholic Biaknak kong cu a cawnpiak lengmang hna.

Mah a cawnpiakmi hna khua lakah Matupi peng um Dai miphung hna umnak Rung le Ngapang khua pawngkam i a ummi khuate hna cu nihin ni tiang Roman Catholic Biaknak a biami ah an cang.

Mah hna  khuahrawng cun Roman Catholic Biaknak chung rianṭuantu hna an um leen. Biaknaklei an karhcho caah 2008 kumchung ah Area thar (New Parish) an pek hna i zohkhenhtu phungdawci pakhat an chiahpiak hna i nihin tiang zumtu cu an karhcho cuahmah ko.

Cu lengah Matu miphun an umnak Cangtak khua zongah Roman Catholic Biaknak cu a cawnpiak hna i zumtu zong tampi an um ve.

Cangtak khua mi i an khuasak tintuknak, an ei an dinnak, an cacawnnak le an lam le an sul an harning cu amah pumpaakte in a hmuh dih hna caah Cangtak khua mi inn 40 cu Kyaukhtoo khua ah a ṭhialter dih hna i innchungkhar pakhat cio caah vawlei, lei le inn zong a cawkpiak dih hna.

Mah inn 40 um minung (zumtu) vialte hna zohkhenhtu ah 2010 kum chung ah Tlangbawi (bkef;awmfMuD;) pakhat a chiahpiak hna.

Rev. Nicholas Mang Thang cu 1978 kum in 1980 kum tiang Mindat khua ah a um i Kanpetlet peng Lohse, No.1 Mawne … te hna. Thlangki khua vialte zong a zoh dih hna.

1981 kumchung ah Catholic Sayadaw vialte nih an thlah bantukin American ram, New York khua ah cacawn ah a kal.

Mah New York University ah cun Biaknaklei Degree Dogmatic Theology (M.A) degree a hmu i 1983 kumchung ah Kawl ram ah a rak kir ṭhan. Cu hnuah cachimtu rian kum li a ṭuan.

Cun 1986 kum in 1988 kum tiang Pyin Oo Lwin Institute of Philosophy ah Spiritual Director rian a ṭuan. Mah hnu cun Yangon Institute of Theology sianginn ah 1988 kum in 1989 kum tiang Yahan cannak University ah Sayaci (Rector) rian cu kum hnih chung a ṭuan.

Cu hnuah Mandalay, Arch Diocese ca i a herhnak bantukin Rome khua in Pope John Paul (2nk) nih Mandalay Diocese Archbishop R. Founs U Tan Aung rian a bawmtu sayadaw (Auxiliary Bishop) ah 1989 kum January 15 ni ah an pek.

Mah Auxiliary Bishop an pekpah ah cun Doctor of Divinity (D.D) degree zong an pekchih. Mah rian an pek hnu cun Chin ramchung dihlak tavuan a lak i khual a tlawng lengmang.

Mah hnu cun Pope John Paul (2nk) nih 1992 kum November 21 ni ah Hakha Diocese ah a hmasa bik Bishop ah an thim i an kuat.

Cu hnuah 1993 kum March 21 ni ah Hakha Diocese uknak hunnak puai cu Chin State Capital Hakha khua ah sunglawi ngaiin an tuah.

Rev. Nicholas Mang Thang cu tuukhal a si bantukin a thinlung put a ṭhami a si. A lung a sau i inkhawhnak a ngei. Mi dang duhnak a theithiammi a si.

Thazaang a dermi, si a fakmi minung hna cu a bawmh zungzal hna. A tlamtlinlonak pakhat cu, “Mi lehrulh ti hi a thiam lo.

Ralchanh zong a hmang lo,” Amah a ralchanhmi minung hna cu a hlei in bawmh a duh hna. Rian a ṭuan tikah a ba in chiah a duh lo i ပြတ်ပြတ်သားသား te in ṭuan a duh zungzal.

Chin ram chungah miphun tampi umnak ram a si bantukin Biaknak zong a phunphun umnak ram a si. Biaknak aa ṭhen dih bantukin thinlung zong aa ṭhen dih.

Asinain Rev. Nicholas Mang Thang cu, “Pathian pakhat, Zumhnak pakhat, Tipilnak pakhat,” (Efasa 4:5) chung Baibal cacang cu a zungzal aa tlaihpengmi a si.

Rev. Nicholas Mang Thang nih Auxiliary Bishop cu kum thum leng a ṭuan hnu 1992 kum November 21 ni ah Hakha Diocese caah Bishop an pek i nihin tiang a ṭuan.

Bishop Nicholas Mang Thang cu Kawl ram Pumpi Catholic Bishop vialte meeting pi ah chungtel sinak nawl an pek caah mah Bishop Conference pi nih cun amah cu a tanglei ṭuanvo vialte cu an pek.

1. Khuasak tintuknaklei ṭhanchonak (Incharge of Social Development)
2. Biaknaklei ṭhanchonak (Incharge of Evangelization)
3. Biaknak kong cawnpiaknak (Incharge of Catechesis ( Catechinsin Books).
4. Theological he pehtlai in Rampumpi zung tavuankhan. (O.T.C) Bishop Nicholas Mang Thang nih Chin mi ṭhanchonak (Social Works for the Chin People) caah a tanglei bantukin a tuahpiak hna.
5. Chin mi ṭhanchonak caah 1999 kum in 2010 kum tiang khua 80 (khuate) nak tam caah din awk ti a tuah piak hna.
6. Khuate sianginn (Boarding Schools) khua 20 leng a tuah piak hna.
7. Khuate (Affliated Schools) sianginn 10 a tuahpiak hna.
8. Lothlawhnak: i. Chungkhar 900 caah a tuahpiak hna.
9. Damnak Zohkhenhnak hmun li ah a tuahpiak hna.
10. Mucu (Ngakchia zohkhenhnak) khua hra ah a tuahpiak hna.
11. Mizaw zohnak (Clinics) khua hra ah a tuahpiak hna.
12. Teddim peng Mainuai khua ah Tar zohkhenhnak inn pakhat a tuah.
13. Hmun hra ah hlei a donh.
14. Khua karlak lam hmun 25 ah a cawhter hna.
15. Ti in lakmi mei (hydro-power) khua nga ah a ser.
16. Khua thar khua hnih a tlakpi hna.
17. Sifak bawmhnak cu atu le tu a tuahpiak hna.
18. Ngakṭah sianginn 2, minung 25 veve a bawmh hna.

Bishop Nicholas Mang Thang cu England, Germany, France, Italy (Rome) le Philippines ram hna ah kumfate a kal lengmang. Cun U.S.A. ah voi tampi a kal i Tuluk ram ah voi li, Hongkong ah voi thum, Japan ram ah voi hnih, Korea ah voi khat le Asia ramchung ah tu le tu a kal leng mang.

(Sayaci Dr. Bawi Hu nih Chin Hmaisuang Hna Tuanbia Section 1 chung ta ka tarmi a si, Crd: Lianhakha)