Pu Hlur Hmung (1895-1979)

Pu Hlur Hmung cu  ''   Pinlung Conference ah Falam miphun aiawh in min thu hmasa biktu a si"

Pu Hlur Hmung cu Lumbang Mi-uk Pu Naih Vum le Pi Zum Bawi hna fapa upa bik a si i 1895 kum October 8 ni ah Lumbang khua ah a chuak. Hlur Hmung cu 1904 kum in Falam ah sianginn a kai.

A pa nih 1907 kumchung ah a thihtak i a nu nih sianginn cu a kaiter i 1912 kum ah Kawl ca tang sarih a awng. A pa a thih lioah cun a ngakchiat deuh rih caah Mi-uk rian cu Pu Khuang Bik nih a ṭuan chung i amah cu kum 19 a hung tlin tik hnu lawngah Mi-uk rian cu a hun ṭuan.

Mirang Cozah nih German raldoh lio i rianṭuantu dingah Chin mi pa vialte France ram ah nan kal dih lai, tiah awdar an rak chuah caah 1917 kum October 7 ni in Falam cun minung 152 he a pok ve i October 17 ni ah Rangoon khua an phan.

Rangoon khua a phanmi Chin mi an dihlakah minung 1200 an ti. Sangphawlawng in Rangoon khua cun an kal i France ram Liue khuapawng Buhe khua ah an um.

Pu Hlur Hmung cu 78 Burma Labour Company, Indian Expecditionary Force ‘A’ ah Chin ralkap hruaitu Halvidar a ṭuan i raldohnak ca i a herhmi rian paoh an ṭuanter hna.

Vawleicung Ralpi Pakhatnak (German ral) cu 1918 kum, November 11, 11 am ,11 minute, 11 second ah remnak an tuah ruangah a dai i Pu Hlur Hmung le a hawile cu 1919 kum January 9 ni ah France ram Mrseilles khua in Kawl ram ah sangphawlawng in an tlung i February 26 ni ah Rangoon khua an phan. March 21 ni ah Lumbang khua an phan i Mi-uk rian cu a peh ṭhan.

Vawleicung Ralpi Pahnihnak (Japan ral) cu a tho ṭhan i 1943 kumchung ah Japan cu Chin ram an phan i Mirang ralkap pawl cu October thlachung ah India ram Imphal khua ah umhmun an khuar.

Pu Hlur Hmung cu Bualkhua ah a rol. 1943 kum donghlei ah Mirang cu a zulh hna i Phaisat khua a phan nain Japan an rak phanh cang caah a kir i khua ah a um ṭhan.

Khua a phanh cangkate cun Japan nih an tlaih i Tedim ah an kuat. Mah lioah cun Japan cakapian ah Yoke Chao a rak si i amah he cun an i theih hngalh caah Japan bawi Enada sinah a chimpiak i thongthlak loin Rs. 1000/- liam ding a si.

India thir tangka fangte in an liam hnuah a luat. Khua ah a tlung i 1944 kum August le September thla hnih chung Japan kut tangah khuabawi rian a ṭuan.

Japan ral a dih i Mirang pawl Chin ram an phanh ṭhan tikah Yoke Chao cu an tlaih i 1945 kum February 2 ni ah Falam i a bia an ceih tikah Pu Hlur Hmung nih Mirang bawi sinah a chimhpiak caah a luat ṭhan.

Pu Hlur Hmung cu Kawl ram luatnak kongkau ceihmai dingah Hakha Mi-uk Pu Kio Mang le Tonzang Mi-uk Pu Pum Za Mang hna he Shan ram Pinlung khua ah a kal i 1946 kum March 22 ni ah a phan.

March 27 ni ah Kawl ram chung um palai dihlak meeting cu an tuah i Kawl ramchung um miphun vialte lungngete in Kawl ram luatnak (Independence) cu lak dingin lungtlinnak cachoke an tuah.

Pinlung khua i Kawl ram luatnak Cachoke an tuahnak kongkau vialte cu mahle khua le ram le miphun vialte hna sinah chim le thanh cio ding a si bantukin Pu Hlur Hmung zong cu 1946 kum April 20 ni Falam peng chung um Mi-uk le khuabawi 300 reng lo he Falam khua ah tonnak an ngei i Pinlung khua i Kawl ram luatnak kongkau an ceihmi le lungtlinnak cachoke a tuah venak kong vialte a chimh dih hna i meeting a kaimi dihlak an lung a tling.

Pu Hlur Hmung cu a voi hnihnak Pinlung Conference cu Pu Thawng Za Khup, Pu Kio Mang, Pu Vum Ko Hau, Pu Sa Vut le Pu Ngun To hna he an kal i 1947 kum February 6 ni an phan ṭhan.

1947 kum February 9 ni ah Buchoke Aung San he Chin mi palai pathum hna cu i tonnak an ngei i Buchoke Aung San nih Kawl ram luatnak laknak kong le lungngete in umṭinak kong bia a ruahmi hna vialte cu lungtlingte in an cohlan.

1947 kum February 11 ni ah Kawl, Kachin, Chin, le Shan palai dihlak nih Kawl ram Thantaar (နိုင်ငံတော်အလံ) kong an ceih. 1947 kum February 12 ni zinglei suimilam 11 bak ah Pinlung khua i relkhawmmi Kawl ram luatnak lungtlinnak he pehtlai in lungtlinnak Cabupi chungah Chin ram in palai pathum nih lungtlinnak min an thut.

Mah Cabupi chung i min a thumi cu an dihlakah minung 24 an i tel. Pu Hlur Hmung cu Kawl ram luatnak a hmuh ni 1948 kum Januray 4 ni zongah တိုင်းပြည်ပြုလွှတ်တော်အမတ် ṭuanpah in Yangon khua ah aa tel ve.

Pu Hlur Hmung hruainak in Lumbang khua ah 1925 kumchung ah Lai ca tang li sianginn an hun i sianginn le bawda a sakter hna. Cu hnuah 1946 kum March 29 ni ah Zanniat Rural Uplift Society timi ṭhanchonak tuah ding an ti i April 15 ni in an thawk.

Cun Zanniat Anglo Vernacular School timi Mirang Sianginn zong 1946 kum May 15 ni in an tuah. Mah Private Middle School cu Cozah nih 1947 kum June 1 ni in State Middle School ah an tuah.

Mah hnu cun Varung Bangla in Lumbang khua tiang a ukmi khua 56 dihlak nih mawṭawka lam an tuk i Lumbang khua tiang cu mawṭawka hme a phan kho. Kalaymyo in thilri vialte cu mawṭawka in Lumbang khua tiang cu an phawrh. Lumbang le Pamuachaung ah dawr an tuah.

1948 kum February 20 ni thawk in Chin National Day run thawk a si ruangah Pa Hlur Hmung cu a Mi-uk rian cun aa dinh hnuah Zanniat Circle No.2 Circle Chairman ah an thim i a ṭuan.

Pu Hlur Hmung hruainak in 1953 kum January 28 ni thawk in Vaar le Falam kar meng 12 chung mawṭawka lam a ukchung minung 565 a cawhpi hna i 1953 kum March 12 ni zanlei suimilam 4:00 ah Falam khua chungah a hmasa bik mawṭawka a phanhter.

1951 kum August 9 ni ah Pu Hlur Hmung nih Siipeknak (Dispen-sary) cu a inn tangah a phunhter hna i 1955 kum May 5 ni ah Khuate Siizung (Rural Health Centre) Cozah nih an pek hna.

1955 kum January 10 ni ah Mass Education (လူထုပညာရေး) siang inn cozah nih a tuahpiak hna i cathiam lo pawl zan ah ca an cawng. Pu Hlur Hmung cu a kum a upa cang i damlonak a phunphun a ngeih caah 1974 kum March 5 ni in a rian cun aa din.

Pu Hlur Hmung nih minṭhatnak laksawng a hmuhmi hna cu-

1. 1920 kumchung ah A.T.M. (အမှုထမ်းကောင်းတံဆိပ်) le meithalphir,
2. 1922 kumchung ah I.D.S.M (Indian Distinguised Service Medal) le meithalphir,
3. 1934 kumchung ah Zipeng Burne nih rianṭuan ṭhatnak meithalphir,
4. 1935 kumchung ah King George V nih Silver Jubilee Medal,
5. 1946 kumchung ah Zipeng Thein Maung nih Pangpawi Meithal (pistol) le zenthong 100.
6. 1947 kum December 19 ni ah B.E.M. (British Empire Medal), le
7. 1959 kumchung ah Kawl ram Tamada U Ba U nih W.K.H. (Wunna Kyaw Htin) a pek.

Pu Hlur Hmung cu a dam lo caah Falam siizungpi ah an thlopbul len nain a dam khawh ti lo ruangah 1979 kum June 26 ni, amah kum 84 zanlei suimilam 3:10 ah Falam siizungpi ah a thi i a ruak cu Lumbang ah an phawrh i June 28 ni ah an vui.

Pu Hlur Hmung fale hna cu-

Nupi hmasa Pi Mang Cung he Nu Shwe Aye an hrin.

Nupi pahnihnak Pi Cong Nuam he- 1. Pa Sang Lian, 2. Nu Cer Thluai, 3. Nu Sang Cer, 4. Nu Sui Hlen, 5. Nu Ngun Meng, 6. Nu Hrang Hlen, 7. Nu Khin May, 8. Nu Than Htay, 9. Pa Vum Sang, 10. Pa Lal Tin Lian le 11. Nu Sui Nem, tiah fapa 3 le fanu 9 a ngeih hna i Pa Sang Lian dah ti lo U.S.A ah an um dih.

Pu Hlur Hmung, Pu Thawng Za Khup le Pu Kio Mang hna cu Hakha khuacuanhnak hmun ah a mui milem zong toh an i tim. A tang hmanthlak hi Milem tohnak caah an chiahmi a si. Thawng Za Kup kong zong tar khawh kaa zuam te lai.

cc:  Lai ram mi langsar pawl le Pathian Kutneh Mawizia, page 229 – 242.